'IRAVU'--A poem by R.Natarajan

               

  

                இரவு 

மேய்வதற்குச்  சென்றிருந்த  கறவை --இரை 

           வேண்டுமட்டும் சேகரித்த பறவை --கதிர் 

ஒய்வதற்குள் வீடடைய 

            ஒல்லெனவே  சென்றதனுள் 

            ஒடுங்கும் -உள்ளே -இடுங்கும் !

காய்வதனால் இவ்வுலகை அளிப்பான் --வெய்யோன் 

             கத்துகடல்  மூழ்கியுடல் குளிப்பான் --உள்ளே 

பாய்வதனால் வெப்பமது 

             பட்டெனவே  சட்டெனவே 

             பறக்கும் -குளிர்- பிறக்கும் !

செஞ்சுடரை எங்கெங்கும் தேடி --வானில் 

             சீர்விழிகள் தோன்றுமொரு கோடி -அவை 

துஞ்சலின்றித் தேடமதி 

              தூவிளக்காய் நல்லொளியைத்   

              தூவும் -வந்து -மேவும் !

கொஞ்சமல்ல வெண்ணிலவின் பெருமை --அதைக் 

              கூறிடவே சொற்கிடைத்தல்  அருமை -நம் 

நெஞ்சயள்ளும் கங்குலதன் 

              நேரிலா இக்  காட்சியின்பம் 

               நிலைக்கும் -துன்பம் -தொலைக்கும் !

மங்கையர்கள் தீபவொளி ஏற்றி --மால் 

              மருகனவன் நற்புகழைப் போற்றி -நிறை 

கொங்குமலர் சூடிடுவார்    

              கூந்தலிலே ,எங்கும் மணம் 

              கொழிக்கும் -உவகை-செழிக்கும் !

தங்கணவர் வரவை எதிர்  பார்த்தே  --அவர் 

              சாளரத்தை நோக்கி விழி  சேர்த்தே -தவிப்பால் 

அங்கிங்கும் அலைந்திடுவார் 

              ஆவலுடன் காத்திருப்பார் 

              அசைந்து -நெஞ்சம் -இசைந்து !!!