Vetriyum sooduvom -A song on Goddess Saraswathi-By R.Natarajan

                                      வெற்றியும் சூடுவோம் !

ஏழிசை யாழினை ஏந்திய பாமகள் 

     இயம்பிடும் சொற்களை இயக்கிடும் நாமகள் 

ஊழினைக் கடக்கவே உதவிடும் கோமகள் 

      உயரிய அருங்கலை உறைந்திடும் மாமகள் !

நோக்கினில் கலைகளின் நுண்பொருள் விளங்கிடும் 

      நொடியினில் ஞானமும் கல்வியும் துலங்கிடும் 

பாக்களில் பூக்களின் நறுமணம் வீசிடும் 

      பாரினில் கற்களும் வாயினால் பேசிடும் !

உறுதியும் தெளிவுமே சேர்ந்திடல் வேண்டுமே 

      உள்ளொளி பெருக்கியே அவளருள் தூண்டுமே 

சிறிதள வாயினும் அவள்புகழ் பாடுவோம் 

     செயல்களில் புகழுடன் வெற்றியும் சூடுவோம் !