உயிர் பெற்ற உயிர் எழுத்துக்கள் -A poem by R. Natarajan-

                                      உயிர் பெற்ற உயிர் எழுத்துக்கள்

(ஆங்கிலத்தில் Spike Milligan என்ற கவிஞர் எழுதிய ' THE ABC " என்ற
 கவிதையை ப் படித்தவுடன்  தோன்றிய உந்துதலில் பிறந்த படைப்பு இது )

விடுமுறை நாளில் விடுதலை கிடைத்ததால் 

ஏட்டை விட்டே எகிறி வெளியே 

உலவச் சென்றனர் உயிரெழுத் தனைவரும்

ஆய்தமும் அட்டைபோல் ஒட்டிக் கொண்டான் .

வேலை இன்றேல் வீண்குழப்பம்   தானே.

அடுத்தவன் தலையில் அழுத்தி" அ"  குட்டினான் .

" ஆ" என  அவனும் அலறித் துடித்தான் .

அடிக்கு அஞ்சி அங்கம் சுருட்டினான்" இ".

ஈ என இளித்திட்டு என்மேல் இரங்கிடு --

நான்காம் நபரோ நடுங்கிச் சொன்னான் .

உ என்றும் ஊ ஊ  என்றும் ஊளையிட்டுத் 

தப்ப எண்ணினர் அடுத்தவர் இருவரும் .

எனைப்போல் நேராய் நிமிர்ந்து நின்றால் 

எப்படி அடிப்பான்  என்றான்" எ"  ஏ ஏ 

வேண்டாம் வம்பு விலகிவா என்றான் ஏ   

"ஐ"யோ  ஐயோ என்று கத்தினான் 

"ஒ "வும் "ஓ "வும்  உள்ளம் கலங்கி 

"ஔ"விடம்  முறையிட அவனும் சொன்னான் :

என்னைப் போல துணையுடன் வந்தால் 

அச்சம் உண்டோ அறிந்து கொள்வீர் .

எஃகு  நெஞ்சத்து ஆய்தம் "ஃ" உரைத்தான் :

அடிப்பவன் அலறிட ஆயுதம் எடுப்போம் 

தடிப்பயல் தானே தணிந்து போவான் .

ஆயுதம் என்றதும் அசட்டுச் சிரிப்புடன் "அ"

விளையாடிப் பார்த்தேன் வினையாய் மாறியது 

வீட்டுக்குப் போகலாம் வருந்துகிறேன் என்றான் 

கூட்டுக்குத் திரும்பும் பறவைகள் போன்றே 

ஏட்டுக்குள் நுழைந்தனர் -இனிதே உறங்கினர் .